Ab joi et ab joven m'apais (Contessa de Dia) (The Lied and Art Song Texts Page: Texts and Translations to Lieder, mélodies, canzoni, and other classical vocal music)


Ab joi et ab joven m'apais
e jois e jovens m'apaia,
car mos amics es lo plus gais
per qu'ieu sui coindet'e gaia;
e pois eu li sui veraia,
be-is taing q'el me sia verais,
c'anc de lui amar no m'estrais
ni ai cor que m'en estraia.

Mout mi plai car sai que val mais
sel q'ieu plus desir que m'aia,
e cel que primiers lo m'atrais
Dieu prec que gran joi l'atraia;
e qui que mal l'en retraia,
no-l creza, fors so qu'ie-l retrais:
c'om cuoill maintas vetz los balais
ab q'el mezeis se balaia.

E dompna q'en bon pretz s'enten
deu ben pausar s'entendenssa
en un pro cavallier valen,
pois ill conois sa valenssa,
que l'aus amar a presenssa;
e dompna, pois am'a presen,
ja pois li pro ni-ll avinen
no-n dirant mas avinenssa.

Q'ieu n'ai chausit un pro e gen
per cui pretz meillur'e genssa,
larc et adreig e conoissen,
on es sens e conoissenssa;
prec li que m'aia crezenssa,
ni hom no-l puosca far crezen
q'ieu fassa vas lui faillimen,
sol non trob en lui faillensa.

Floris, la vostra valenssa
saben li pro e li valen,
per q'ieu vos qier de mantenen,
si-us plai, vostra mantenensa.

Authorship

Contessa Beatriz (?) de Dia (fl. late 12^th century)

Musical settings (art songs, Lieder, mélodies, (etc.), choral pieces, and other vocal works set to this text), listed by composer (not necessarily exhaustive)

[ None yet in the database ]

Set in English, a translation of Meg Bogen [text unavailable]

David Evan Thomas (1958-)

Songs of the Trobairitz

Date added to the website: 2009-01-09.

Gentle Reminder

This project is not funded. If you found the information here useful, please consider making a donation. Your gift is greatly appreciated!
- Emily

I also have a wishlist at Amazon.ca.