J'ai tant mon cuer et mon orgueil creü

 J'ai tant mon cuer et mon orgueil creü
 Et tenu chier ce qui m'a deceü
 Et en vilté ce qui m'amoit eü,
 Que j'ay failli
 Aus tres dous biens dont Amours pourveü
 Ha par pitié maint cuer despourveü
 Et de la tres grant joie repeü
 Dont je langui.
 Lasse! einsi m'a mes felons cuers trahi,
 Car onques jour vers mon loyal ami
 Qui me servoit et amoit plus que li
 N'os cuer meü
 Que de m'amour li feisse l'ottri.
 Or sçay je bien qu'il aimme autre que mi
 Qui liement en ottriant merci
 L'a reçeü.
 Si le m'estuet chierement comparer,
 Car je l'aim tant c'on ne puet plus amer.
 Mais c'est trop tart: je ne puis recouvrer
 La soie amour;
 Et s'ay paour, se je li vueil rouver,
 Qu'il ne me deingne oïr ne escouter
 Pour mon orgueil qui trop m'a fait fier
 En ma folour;
 Et se je li vueil celer ma dolour,
 Desirs espris d'amoureuse chalour
 Destraint mon corps, et mon cuer en errour
 Met de finer.
 S'aim miex que je li die ma langour,
 Qu'einsi morir, sans avoir la savour
 De la joie qu'est parfaite douçour
 A savourer;
 Et dou dire ne me doit nulz blamer
 Qu'amours, besoins et desirs d'achever
 Font trespasser mesure et scens outrer.

 Lasse! je sui en aventure
 De morir de mort einsi dure
 Com li biaus Narcisus mori,
 Qui son cuer tant enorguilli,
 Pour ce qu'il avoit biauté pure
 Seur toute humeinne creature,
 Qu'onques entendre le depri
 Ne deingna d'Echo, qui pour li
 Reçut mort amere et obscure.
 Mais bonne Amour d'amour seüre
 Fist qu'il ama et encheri
 Son ombre et li pria merci,
 Tant que en priant mori d'ardure.
 Lasse! et je criem morir einsi,
 Car onques de mon dous ami,
 Quant il m'amoit de cuer, n'os cure.
 Or l'aim et il me het, aymi!
 Telle est des femmes la nature.

 Ego moriar pro te.

by Guillaume de Machaut (c1300-1377)

Musical settings (art songs, Lieder, mélodies, (etc.), choral pieces, and other vocal works set to this text), listed by composer (not necessarily exhaustive)

by Guillaume de Machaut (c1300-1377) , "J'ai tant mon cuer et mon orgueil creü" [three-voice motet]

Added to the website between May 1995 and September 2003.

Gentle Reminder

This project is not funded. If you found the information here useful, please consider making a donation. Your gift is greatly appreciated!      - Emily I also have a wishlist at Amazon.ca.

Search/Shop for

Sheet music:

  Search sheetmusicplus.com for J'ai tant mon cuer et mon orgueil creü, Art song , Lieder, chansons, or works for solo voice
  Search musicroom.com for J'ai tant mon cuer et mon orgueil creü, vocal/choral music

CDs:

  Search amazon.com for J'ai tant mon cuer et mon orgueil creü, art song, Lieder, or chansons
  Search amazon.ca for J'ai tant mon cuer et mon orgueil creü, art song, Lieder, or chansons

Books:

  The Art of the Song Recital [amazon.com]
  The Book of Lieder: The Original Texts of Over 1000 Songs [amazon.com]
  French Song Companion [amazon.com]
  Search amazon.com for art song, Lieder, or chansons
  Search amazon.ca for art song, lieder, or chansons

Classical Vocal Repertoire